انا لا اكذب ولكنى بهيس

كان لى صديق حلوف ... بأقوال المحششين ملهوف

قلت له يوما فى أحد الغرز ... مساء الخيــــر على الناس الفيــــــــــر

قال لى خد منى حكمه مهاوده ... اشرب فى غرزه فأن الكيف مناوله

وبعد نفسين وحجرين حلويين ... انعدل المزاج وقلنا بوقين شغاليين

قلت له كيف ترى حال البلاد ... فترك لْى الجوزه وضرب زغروف من بتوع شداد

وقال البلاد فى أحسن حال ... لولا شويه معرضه عاملين هوليله واستهبال

دى الحريه فى اذهى عصورها ... والانتخابات ميين فل فشر اروبا
والاجازات مفيش اكتر منها ... والفلوس بتتشال بالقفه

وصحه الشعب فى احسن حال ... غيرش بس شويه كحه على اسهال

وعندك زلموكه واتنين وتلاته ... ورصيد فى سويسرا وشاليه فى السخنه

وعيالك بيدرسوا ويهيصوا فى اروبا ... ومراتك بتروح الاوبرا

ولا انت مش عاجبك الحال ... وشكلك من المعارضه وحتنضرب بالنعال

ويبدوا انك بكلامى غير مقتنع ... فهرب دمى ولونى امتقع

فنهض وقال انت عميل ... وطلب الشرطه فجأءت فى السريع

ودخلوا الغرزه بأحلى تحيه ... وقبضوا عليا وشكروا الفتيه

وقالوا يسٌجن ويٌعدم فى اسرع وقت ... فلعنه الله على من يفكر

ولعنه الله على اعداء النظام ... تاركى الغرز ومعارضى الاحوال

فأما ان تحشش وتشكر الرئيس ... واما تفكر وتروح فطيس

ملحوظه

.

هذا ليس شعرا

.

ولا نثرا

.

وانما تهييييييييييييييييييييس

.

توقعات انتخابيه

الانتخابات المصريه


من 2011 وحتى 2047




هذه هى احد الاحتمالات وليست الطريقه الوحيده للحكم الفتره القادمه


وهذا يتوقف على موافقه امريكا على التوريث



وعلى ما سيفعله الشعب المصرى خلال عامين

أعتقد ان الرئيس مبارك "اذا اطال الله عمره " حتى عام 2011 فهو لن يترشح للأنتخابات القادمه على مقعد الرئاسه, وسيترك الحكم وهو حى حتى لا يسقط النظام ولكن فى نفس الوقت وحتى لا تغضب العمه امريكا على النظام ورجاله على التوريث , ولانه لا يوجد احد من المصريين يريد انتخاب السيد جمال مبارك بأستثناء رؤساء تحرير الجرائد القوميه . لذلك فلابد من " محلل " يمسك الحكم لفتره رئاسيه واحده حتى يمنع الكلام عن التوريث . ولكن يجب ان تتوفر فيه عده شروط ومنها



ان يكون مضمون ولاءه للنظام ورجاله



كما يجب ان يكون لديه قبول من الشعب المصرى



ويجب ايضا ان يكون سنه كبير حتى لا يستطيع ترشيح نفسه اكثر من فتره واحده ويترك بعدها مقعد الرئاسه لانتخابات يأتى معها السيد جمال مبارك الى الحكم



واذا بحثنا عن رجل بمثل هذه المواصفات نجدها تنطبق على السيد عمر سليمان مدير المخابرات




فهو تخطى السبعين عاما


وله سيره ذاتيه كبيره ومشرفه فى مجال المخابرات



ويعتبر من انجح رجال المخابرات فى العالم



ويدين له الرئيس مبارك بحياته بعد ان انقذه من محاوله اغتياله فى اديس ابابا فى التسعينيات بعد ان اصر أن تسافر سياره مصفحه الى اثيوبيا لتنقل الرئيس هناك لوجود خطر على حياته




وكان رأيه صحيح وتعرض لمحاوله اغتيال وكان موجود فى عربه الرئيس اثناء اطلاق النار عليها



وكما ان سنه لا يسمح له بالترشح اكثر من فتره انتخاب واحده




وتوافق ايضا امريكا على توليه الرئاسه ولديه قبول لدى الشعب المصرى لتاريخه الطويل



وبالطبع تواجده سيسهل على السيد جمال مبارك مزاوله نشاطه المعتاد والاعداد لترشيح نفسه فى انتخابات عام 2017 منعا لموضوع التوريث الذى لا يقبله الشعب المصرى





وهذا ايضا سيجعل المعونات الامريكيه تأتى دون انقطاع ويظل الدعم المصرى للشقيقه اسبانيا والشقيقه اسرائيل فى قطاع الغاز ويظل الحال كما هو عليه حتى انتخابات عام 2047




هذا اذا ان النظام لا تزال لديه ورقه توت يحافظ بها على حيائه مع الشعب




اما اذا لم ينتفض الشعب



سيتم التوريث مباشره دون محلل ودون وسيط



عينى عينك يعنى





يدينا ويديكم طولة العمر والصبر على ما اصابنا




وارجع واقول




احنا اللى عملنا كده فى نفسنا



والسكوت علامه الرضا


.

ثوروا تصحوا

ثوروا تصحوا

لو كان فى بلادنا مسؤول واحد راجل بمعنى الكلمه وشاهد هذه الصوره لكان أكرم له الانتحار رميا بالرصاص او على الخازوق

ماذا تبقى من كرامتنا بعد هذه المهانه والذل

للعلم هذه السيده مسؤوله اسبانيه جائت تعطى الشعب المصرى منحه 30 مليون جنيه مصرى

ووزعتها على الناس ووقفت ترى المهانه المصريه وتقبل المصريات يدها لتحصل على 1500 جنيه

وللعلم ايضا مصر تدعم الشقيقه اسبانيا بالغاز الطيعى لانهم فقراء ويحتاجون الدعم مننا

ونخسر يوميا ملايين الدولارات فى سبيل دعم الغاز لاسبانيا واسرائيل

ثم تحضر مسؤوله اسبانيه بمنحه لا تساوى شئ بالنسبه لخسائر الغاز

وتلتقط صور والمصريات يقبلون يدها استحسانا من اجل 1500 جنيه

ويتم نشر الصور فى جميع انحاء العالم لتدل على ان اسبانيا تعطينا معونات واننا غلابه ونستحق الاحسان

ولكننا نستحق اكثر من ذلك

لاننا سكتنا على حقوقنا اكثر من ربع قرن

وتركنا الفساد والفاسدين يمرحون بأموالنا دون حساب

وبعد ان كانت مصر اغنى الدول العربيه

اصبحنا ننتظر احسان الدول الاجنبيه

ولو كان ذلك فى مقابل كرامتنا

ولكن اى كرامه ونحن من فرطنا فيها بالمجان

ويتم سرقتنا فى العلن دون اعتراض منا

ونعرف الفاسدين ولا نفعل شئ لهم

ويجلسون على الكراسى بموافقتنا

ويسرقوننا برضانا

ويقتلوننا بأيدينا ونحن موافقون

وخرج مسرطن الشعب المصرى دون حساب

وخرج سارقوا اموالنا من مصر دون عقاب

وتنتقل السلطه بين ايديهم دون اعتراض

وكأننا شعب من الاموات

اذا سرق منه المليارات لا يعترض

واذا ارتفع سعر السجائر قامت المظاهرات

وبعد نشر هذه الصور فى العالم

انصح كل المسؤولين ان يلبسوا الطَرٌح اكرم لهم

لانكم لستوا رجالا

ونحن ايضا

اما ان نثور

او نصمت الى الابد

لاننا بصمتنا لم نعد رجال

وانما اصبحنا جميعا خوجاااااااااااات

بقلمى

رامى واصل

عدت يا يوم مولده

دراسه نقديه للأغانى المصريه

تعريف الأغنيه

هى اغنيه كتب كلماتها

كامل الشناوى

من قصيده

" يومٌ بلا غد "


وغناء فريد الاطرش


كلمات الاغنيه

عُدت يا يوم مولدي ... عُدت يا أيها الشقي
الصبا ضاع من يدي .. و غزا الشيب مفرقي
ليت يا يوم مولدي .. كنتَ يوما بلا غد

ليت أني من الأزل .. لم أعش هذه الحياة
عشتُ فيها و لم أزل .. جاهلا أنها حياة
ليت أني من الأزل .. كنت روحا و لم أزل

أنا عمر بلا شباب .. و حياة بلا ربيع
أشتري الحب بالعذاب .. أشتري فمن يبيع؟
أنا وهم .. أنا سراب


النقد


1-
عُدت يا يوم مولدى ... عُدت يا أيها الشقي

ونرد عليه

وبأى غم عدت يا يوم
ثمانون عاما من الهم

فعلا كان يوم شقى وتعيس على البشريه كلها

2-
الصبا ضاع من يدي .. و غزا الشيب مفرقي

ونرد عليه

الصبا ضاع والعمر ضاع والمال ضاع
وغزا الجوع والفقر بلادى

وبعدين شيب ايه اللى غزا شعرك

ما انت البعيد بتصبغه علشان تبقى شاب وتروش
وعامل صغير وشباب
انت اضعت الصبا من شباب البلد واخذته لنفسك ولرجلتك
واصبح الشباب فى بلدى كهلا
وكهلها شبابا



3-
ليت يا يوم مولدى .. كنتَ يوما بلا غد

ونرد عليه

ليت يا يوم موته .. كنت اليوم وليس غد

كان يوم ميلادك يوم بلا شمس
يا ليته يوم بلا امس


4-

ليت أنى من الأزل .. لم أعش هذه الحياة

ونرد عليه

وليتك من ثلاثون عاما ما حييت
ولا حكمت البلاد لا اتهنيت


5-

عشتُ فيها و لم أزل .. جاهلا أنها حياة


ونرد عليه

وعشث فيها ولم تزل .. سالبا منها الحياه
وستموت فيها ولن تزل مكروها فيها ومحتقر
الى مزبله التاريخ ولن تعود يا قاتلا فينا الامل



6-

ليت أنى من الأزل .. كنت روحا و لم أزل

ونرد عليه

ليت انك من الازل ..كنت كلبا ولم تزل
واين انت من الكلاب ..فهكذا انا اسب الكلاب


7-

أنا عمر بلا شباب .. و حياة بلا ربيع

ونرد عليه
انت كهلا بلا ثياب .. وانت فسلا بلا حساب
أنت اكذوبه بلا عقاب .. وقاتلا بلا قصاص

8-

أشتري الحب بالعذاب .. أشتري فمن يبيع؟

ونرد عليه

اشترى الاكل بالهوان ..اشترى ولا احد يبيع
اشترى الملبس بالكرامه .. اشترى والكل يبيع


9- أنا وهم .. أنا سراب

ونرد عليه

انت كلب انت غم .. انت عذاب



نصيحه فى النهايه

يا من حرمت طشه الملوخيه
ارحل عنا واطفحها فى اى حته

بقلمى

رامى واصل

مشربتش من نيلها

دراسه نقديه للاغانى المصريه

1-مشربتش من نيلها

فوائد عدم الشرب من النيل

أ - عدم الاصابه بفشل كلوى من تلوث مياه النيل
ب - مش حترجع مصر تانى " اللى يشرب من النيل يرجعله تانى " وده مفيد لامراض الحساسيه والصدر
ج - حتشترى مياه معدنيه يعنى حتشغل مصانع وعماله مصريه
د - ستتحسن المناعه لديك وتتحسن صحتك وروحك المعنويه
هـ - لايزال لديك القدره على الاعتراض والمطالبه بحقوقك


2- طب جربت تغنلها

فوائد عدم الغناء لمصر

أ - وده معناه انك مازلت بكامل قواك العقليه ولم تتجه للغناء بعد
ب - ان لديك وظيفه منعتك من التفكيير فى الانحراف والغناء
ج - انك أديت فتره تجنيدك فى الجيش ولم تهرب منه
د -انك بتحب مصر ومش عاوزها تتبهدل بأغانيك
هـ - انك لا تزال مصرى الى الان وبشكل طبيعى " ادينا فوق فوق فوق"



3- جربت فى عز ما تحزن تمشى فى شوارعها وتحكيلها

فوائد عدم التسكع فى الشوارع والفضفضه عن نفسك

أ - لن يتم القبض عليك تحرى وحترجع بيتك بكامل كرامتك
ب - لن تصبح مثل أغلبيه الشعب المصرى بيمشى يكلم نفسه فى الشارع من اللى بيشوفه
ج - لن يتعرض لك الشباب الكووول اللى ماليين الشوارع وياخدوا فلوسك والبنطلون "البنطلون لا"
د - ستظل تكبت فى نفسك الى ان ترتاح من هم الدنيا وتتوكل الى الله بدرى " بيدى لا بيد ابو جمال"
هـ - ستجد شئ تتحدث فيه مع زوجتك منعا للخرس الزوجى



4- ممشتش فى ضواحيها طيب ما كبرتش فيها

اضرار المشى فى الضواحى والازقه

أ - حتتثبت يعنى حتتثبت
ب - حتركب تكاتك "الصراصير المعدنيه"
ج - حيتكب عليك مياه الغسيل " ماتفتح ياللى ماشى"
د - حيترفع عليك مطاوى وسنج
هـ - حتقع فى بلاعه مجارى مفتوحه ولن تصل بيتك سالما

طيب ما كبرتش فيها

فوائد عدم ترعرك فى مصر

أ - ده معناه انك نشأت فى بيئه صحيه
ب - مش مصاحب على علوكه واشرف كوخه
ج - انك دخلت مدراس بها تعليم سليم
د - متعرفش يعنى ايه تحت الكوبرى
هـ - انت مش واد مخربش


5- عشرت بلدى بتبقى نسينها على البال مش سهل

لان الذكريات السيئه تظل محفوره بالذاكره


6- يمكن ناسى لانك فيها مش وحشاك ولا غبت عليها

يعنى لو مش عاجبك حال البلد
مراكب التهريب لايطاليا على قفا من يشيل " سكه اللى يروح ميرجعش "


7- بس اللى مجرب وفارقها قال فى الدنيا مفيش بعديها

احنا حنكدب من اولها

8- وان جيت انسى تفكرنى بمليون ذكرى القلب شايلها

اصلك تعز الغم زى عنيك
الفقرى فقرى طول عمره



9- ومدام بنحب بلدنا تبقى هتتغير بادينا

ما هى البلد بتتغير بأدينا صحيح
للاسوء طبعا


ربنا يكون فى عون مصر من المصريين

بقلمى

رامى واصل

عاوز ابقى مترب

انا عاوز ابقا مترب

اعزاكى الاسدقاء
انا وعتكم انى اتغير
ووعد فأوفى على رأى حبايبنا الحلوين

علشان كده انا حبيت اغير الاستيل وأعيش فى الدور
فقلت يا واد يا معنمه ايه رأيك تشتغل مترب "اى والله مترب "
سنجر يعنى
قلت يبقى لازم اغير فى شكلى طبعا " علشان الروشنه
رحت اشتريت 5 كيلو جيل وضربتهم على دماغى واشتريت قميص XXXXL
ومفتوح لغايه نصه والوانه عجيبه وكم القميص أطول من دراعى نص متر
واشتريت جنزير وزنه 4 كيلو ولبسته فى رقبتى
وبنطلون low waist " " واقع يعنى
dirty طبعا
ومدى على فيرانى كده
وحزام بتوكه قد دماغى
وجزمه لونها احمر فاقع

ناقص ايه يا واد
آه

واخد وشى علامات العته والبلاهه لزوم الشغل طبعا
يعنى شكل واحد محشش وعامل دماغ عاليه

بس بقى شكلى جنان -واااااااااااو-

مش فاضل غير الاغانى والكلمات اللى حغنيها للشباب الروش الحبوٌب جمهورى العزيز
واخوكوا فى الله فنان طبعا اخر حاجه
قلت يبقى لازمن ولابد يا واد يا فنان تضربلك كلمتين فى العاطفى
ونزل على الألهام "مش الوحل "
وكتبت الاغنيه العاطفيه الجباره
وأسمها

"تحاليلى يا ممتشى "

تحاليلى يا ممتشى تحاليلى
طلعت تحاليلى يا ممتشى
وطلع عندى املاح
اهئ اهئ اهئ
وقلت خلاص بقيت حادق يا ممتشى
قالولى خد فيتامين
وقلت وده كمان مين
هوا انا ناقص مجانين
وقالولى جالك انيميا
قلت دى جاتلى امتى
ده انا ضارب سوسو الصبحيه
قالولى خد بروتين
قلت كده حيبقى حبيبى تخين
وقعدت اعيط بحراره
قالولى مش هى دى الطاره
وأدونى حقنه كمان
شكلها زى الشكمان
وتحاليلى يا ممتشى تحاليلى

وبعد ما خلصت الاغنيه الجنان بتاعتى
قلت فاضل اللحن
ولأنى سبع صنايع والبخت ضايع
قلت يبقى ألحن انا الاغنيه
وانا أولى بالحسنه من غيرى
وبدات بالسيكا
على شويه نهوند
على حبه حجاز
وقفلت بياتى

ورحت مسجل الاغنيه ومنزلها السوق
ومش عاوز اقولكم الاغنيه ضربت قد ايه
ومش ملاحق على الحفلات والبرامج
والفلوس معايا زى الرز

محدش عاوز فلوس سلف

متنكسفوش

ورزق الهبل على المجانين


بس ايه رأيكم فى الاغنيه
جنان مش كده

fin

ودى كانت قصه نجاح مترب شاب
وبلا تعليم بلا وجع قلب

ملحوظه

اخطاء الكتابه من باب التغيير برضه


بقلمى

رامى واصل

كده كِخ

عندما كنا صغار كنا لا نستطيع ان نفرق بين الصح والخطأ ولذلك كنا نعاقب اذا فعلنا شئ حطأ بالضرب على ظهر اليد ويقولون لنا "كده كِخ " حتى لا نكرر هذا الخطأ مره اخرى .
ولاننا ما زلنا صغار فى نظر الحكومه فأنها تعاقبنا بالضرب اذا فعلنا شئ خطأ من وجهه نظرها طبعا مثل المظاهرات او الاضراب وتطلق علينا الأمن المركزى ورشاشات المياه والرصاص المطاطى والحى لكى نتعلم الادب ولا نكرر هذه الافعال المشينه واذا تكرر منا ذلك ألقت القبض على البعض منا واودعته غيابات المعتقل ليكون عبره لمن يعتبر مثلما كانوا يفعلون مع المشاغب من الاطفال بأن يتركوه فى حجره الفئران حتى يتوب عن اعماله السيئه ولا يكررها مره اخرى
وكأن الحكومه وصى علينا لاننا لم نبلغ سن الرشد بعد
وهذه وجهه نظر رئيس الوزراء الذى قال عنا فى مؤتمر صحفى فى امريكا اننا لم ننضج سياسيا بعد ولذلك تعٌلمنا الحكومه الادب حتى نصبح شعب مؤدب لا يعارض حكومته الرشيده,
ورغم اننا شعب عمره الحضارى تجاوز سبعه ألاف سنه ولكننا لا نزال اطفال نحبو فى وجهه نظرالنظام الحاكم,
ولذلك تَعاقب المعترضين عليها بالضرب وتقول لنا " كده كِخ " ولا اعلم من اقنع الحكومه انها امنا وابونا واننا نحتاج الى تربيه من اول وجديد.
الحكومه عاوزه يكون نشيدنا الوطنى
" انتى بابا وانتى ماما وانتى مجانص وانتى كل دنيتنا "
وعندما يغضب الشعب يقولون نفس العبارات المكرره
ويقولون تعداد الشعب هو السبب
واحسبها صح تعشها صح
وشويه اسطوانات مشروخه حفظناها

فأذا كانت هذه هى الامومه فيا أهلا بدار الايتام

بقلمى

رامى واصل

قوم يا مصرى

قوم يا مصرى

نشيد لحنه الموسيقار الكبير سيد درويش منذ بدايه القرن الماضى , ولكن يبدوا ان المصرى مازال نائما منذ صيحه سيد درويش وحتى الان , ويبدوا انه اثقل فى الاكل حتى الثماله فنام ولم يستيقظ رغم كل المحاولات المستميته فى ايقاظه والتى بدات بالكلام ثم الصوت العالى ثم المحاوله باليد ثم الضرب ثم الاهانه والسحل ولكن لا توجد استجابه
كأنه حاله ميؤس منها او انه يرفض الاسيتقاظ ويعيش فى حلم لا يريد الاستيقاظ منه على الواقع المرير
رغم لن تاريخ المصرى الطويل يقول عكس ذلك فتاريخه ملئ بالثورات على الظلم والحروب ضد المستعمر والمكافحه لتحرير ارضه والدفاع عن كرامته والمطالبه بحقه بأعلى صوت
ولكنه تحول بشكل غريب الى حاله الخمول التام واللامبالاه واتجه الى البحث عن لقمه العيش ولو كانت بطعم الهوان وفى مقابل كرامته
فأين ذهب ذلك المصرى الذى كانت تهتز له الدنيا ويخشاه ملوك الدنيا وكان خير اجناد الارض
وانتصر فى الجهاد الاصغر ولكنه انهزم هزيمه كاسحه فى الجهاد الاكبر وهو جهاد النفس
اين المصرى الذى كان يضحى بنفسه مقابل كرامته
اين المصرى كريم العنصرين
اين المصرى ابن البلد الذى لا يقبل ان تمس كرامته
والذى لا يقبل ان يرى فتاه يعاكسها الشباب فى الشارع فيثور عليهم
ويدافع عنها دون ان يعرفها
اين المصرى الرجل الذى تقف على شواربه الصقر
اين المصرى الذى لا يقبل على نفسه الحرام
اين المصرى الذى يضحى بنفسه مقابل حريته ومقابل كلمته
اين المصرى الذى يريط من كلامه
وكلمته بألف عقد
اين الشهامه المصريه
اين النخوه والكرامه وعزه النفس
اين الرجوله


ولا يزال المصرى نائما ولو ايقظناه بالسكين

يا واد قوم يا واد
غلبتنى

بقلمى

رامى واصل

الاختلافات ال10 بين وزاره احمد ووزاره الحاج احمد

(1) ان احمد مش زاى الحاج احمد


(2) ان احمد دائما clean اسم فقط
بينما الحاج احمد clean فعل فقط


(3) من المستحيل ان نغير احمد
ولكن من السهل جدا تغيير الحاج احمد


(4) يركب احمد افخر انواع السيارات ويمتكلك شقق فى اغلى الاماكن ويسير فى مواكب عظيمه تغلق الشوارع لساعات
بينما الحاج احمد يركب " واحد عبووووود " او حتى من الممكن ان تجده فى مترو الانفاق


(5) يخرج احمد من الوزاره " بعد عمر طويل " ليعيش كمليونير ويجد وظيفه تنتظره بمرتب فلكى بخلاف القانون
بينما يخرج الحاج احمد بعد تجربه قصيره فى الوزاره ليعيش افقر مما كان قبل الوزاره


(6) يخرج احمد من الوزاره ولا يوجد احد فى البلد عاوز يشوف وشه مره تانيه
بينما يخرج الحاج احمد من الوزاره والشعب كله حزين على خروجه


(7) يظهر احمد من كلام الجرائد الحكوميه كأنه نبى ملهم و وانه ثانى احسن اختراع بعد الكهربا و يعمل وفقا لرؤيه السيد الرئيس
بينما الحاج احمد يعمل فى صمت واذا تكلمت عنه الصحافه الحكوميه فبخبر مقتضب او اذا كان فى زياره مع السيد الرئيس
ولكن تحترمه كل الصحف المستقله والمعارضه


(8) احمد يحكم ولا يفهم او يخطط
بينما الحاج احمد يخطط ويعمل ولكن لا يحكم


(9) نندهش جدا لتعيين احمد فى الوزاره ثم نكره جدا استمراره ونكسر خلفه "قٌله " عند خروجه من شده الفرح
بينما نتوقع صعود الحاج احمد لهذا المنصب ونفرح جدا لاستمراره ونريد كسر "قٌله " فى راس من اقاله من الحزن على الاقاله


(10) اثبت احمد ان الطول ليس هيبه وانما خيبه
بينما اثبت الحاج احمد ان الصحاب العقول ليسوا فى راحه وانما فى عذاب


ملحوظه
طبعا هذا المقال ليس له علاقه بالتغيير الوزارى الاخير
لا سمح الله

بقلمى

رامى واصل

هز يا واد

هز يا واد !

　

كل شخص لديه القدره على هز جزء معين من جسده ويبدع فيه ايضا ولكن المشكله انك لا تعرف اى جزء تستطيع انه تهزه بكفائه ولنستعرض اجزاء الجسم وطرق الهز لعلك تجد منطقنك الخاصه والاسلوب المناسب لك فى الهز


ولنبدأ بالتدريج من اسفل الى اعلى




(1) صوابع القدم



بعض الناس وهم قله نادره لديهم القدره على هز صوابع القدم والابداع بها فى اكثر من مجال

واولهم طبعا راقصات الباليه فكلنا نتعجب كيف تستطيع ان تقف وترقص على اصابع قدمها برشاقه تحسد عليها

وهناك عدد محدود جدا على مستوى العالم يستطيعون الرسم بأصابع القدم وهذه موهبه خاصه فى هز صوابع القدم نادرا ما نراها




(2) وش القدم



وطبعا له طرق كثيره فى الهز وتجعل صاحبها من اصحاب الملايين مثل لاعبى كره القدم ومواهب الهز فيه متعدده المستويات

ولكل مستوى فى الهز له سعر معين وتصل فى بعض الاحيان لارقام فلكيه




(3) اسفل القدم والكعب



وطبعا هذه منطقه خاصه فى الهز لبعض انواع الرقص مثل الرقص بحزاء ذو نعل من المعدن واستخدامه لعمل موسيقى تصويريه والرقص عليها

ولكنها تحتاج الى تدريب لتكون قادر على الهز




(4)الساق والركبه



والهز بأستخدام الساق والركبه حصرى للرقص البلدى وكنت اظن انه قاصر على النساء ولكننى وجدت رجال مهنتهم الهز وتعليم النساء الرقص

فأذا كنت واد ملُعٌبَ فأبحث عن نفسك فى هذا المجال




(5) منطقه الوسط



كان من الممكن ضم هذا الجزء للجزء السابق ولكن بعد البحث والتحرى اكتشفت مجال اخر تستطيع ان تهز فيه

وهى رقصه الهيلا هوب فهى رقصه تقوم بأدائها بمنطقه الوسط فقط وانتشرت فى مصر فى الستينيات ايام زوجه المشير




(6) منطقه الصدر



هذه منطقه تشترك فى اكثر من مجال

فى الرقص البلدى " راجع رقصات فيفى عبده " او فى الغناء " راجع كلبات هيفا وهبى "

او تشترك فى كره القدم " اخد الكوره على صدره و طلعها من مناخيره "




(7) منطقه الذراعين



هذه اكثر منطقه تستطيع ان تستخدمها فى الهز وليس الساقين عكس ما يعتقد البعض

ولها استخدامات كثيره جدا ومنها



1- اعمل bodybuilding

وفى هذه الحاله تستطيه ان تهزهم وتشتغل bodyguard

وطبعا حتكسب ذهب




2- اشتغل بلطجى

وهذا يختلف اختلاف كلى عن الحارس الشخصى المدرب

ويكون لك استخدامات كثيره مثل الانتخابات او تخليص حق بين تجار او تقوم بأبتزاز الناس او قاطع طريق او رواء رقاصه




3- اشتغل بالكتابه

وهذا المجال له طرق عديده فى الهز منها على سبيل المثال لا الحصر

كاتب مسلسلات او كاتب اغانى شبابيه او مسرحيات تجاريه او افلام الموسم او تهز قلملك خلف الرئيس ورجاله

ولكنى احذرك الا تعمل فى الكتابه الجاده فلن تأتى لك بالنفع وستجلب لك المشاكل ولن تجد احد يقرأ لك




4- ملاكم

وتستطيع استخدام قبضه يدك فى الضربه القاضيه وتكسب اموال طائله

ولكنك ايضا قد تصاب ببعض الكسور والكدمات فهى طريقه صعبه فى الهز




5- موافقه

اى ان تكون عضو فى مجلس الشعب فما عليك الا ان ترفع يدك تعبيرا عن الموافقه




6- الصوابع

ممكن تشتغل طبال او صاجات او حتى بيانوا تكسب فى الافراح والكباريهات دهب




(8) منطقه الرأس

من الممكن استخدام الرأس ككتله واحده تهتز

اذا كنت عضوا فى احد المجالس النيابيه كدليل انك تفهم ما يدور حولك


وتنقسم منطقه الرأس فى اسلوب الهز الى عده طرق

ومنها




1-اللسان

هز لسانك تكسب ذهب اما ان تكون مطرب ولا يشترط الصوت الجيد ولكن يشترط ان تملك احد امواهب السابقه فى الهز

اما الساق او الجسم كله او الزراعين مع هز الرأس بدون مبرر

وممكن تهز لسانك فى الحملات الانتخابيه اما فى القاء الخطب او الهتاف لمرشح ضد الاخر

او تعمل مذيع عليك ان تهز لسانك مع ضحكه لا مبرر لها اذا كنت تعمل فى الاذاعه

او مع هز الرأس واليدين اذا كنت مذيع فى التلفزيون




2- العينين

وطبعا هز هذا الجزء خاص بفتره الخطوبه وتسبيل العينين بدون معنى للمحبوبه دون ان تهز لسانك فلا ينصح بأستخدام الاسلوبين معا


　

3- الفم

عليك ان تعتاد على هز الفم دون كلام واصتناع ابتسامه لا مبرر لها لتستطيع ان تواجه الغباء المستشرى حولك




4- الاذن

تستطيع ان تتعلم هز الاذن

وهذا طبعا لتهزها لمن حولك للهروب من اى موقف كدليل على انك مختل عقليا


وبعد ان اخبرتك بطرق واساليب الهز

ابحث عن هزتك المميزه لتكون مميزا




ملحوظه اخيره


قد يقول البعض اننى اغفلت بعض الاجزاء التى تستطيع هزها

وارد عليه بجمله واحده

" اسكت يا قليل الادب حتودينا فى داهيه "

بقلمى

رامى واصل

عاوز انحرف

ظللت طول العمر استمع لنصائح ابى وامى وابتعد عن الشباب الفسدان واالمنحرف وتقل لى " اوعى تمشى مع الواد عبده سكينه " حاضر يا ماما "اوعى تمشى مع الواد سلومه الرخم "
حاضر يا ماما
وينصحنى ابى "اوعى تروح تشرب سجاير " حاضر يا بابا " اوعى تقف على النواصى وتاكل لبان " حاضر يا بابا
وكبرت وانا ابتعد عنهم وانظر اليهم بأشمأزاز واشعر اننى نجوت من ان اكون مثلهم
وكنت اسمع حكايات عن الشباب المنحرف ومغامراتهم واشعر بالغيره انهم يستطيعون فعل اى شئ يفكرون به دون النظر الى اراء الاخرين ولكنى كنت اراجع نفسى واقول "ولكننى اصبحت شخص محترم"
ولكن بعد فتره وجدت اننى لم استمتع بحياتى "والسكينه سرقانى"
ومضى قطار العمر
وذهب حقى فى الحياه مع الريح لان المحترمين فى هذا الزمن اصبحوا شئ غريب وغير مرحب به لانه ليس صاحب خبره فى الحياه ولا يستطيع التأقلم مع الواقع واصبح الشاب المنحرف هو نجم المجتمع لانه يستطيع فعل اى شئ يريده ويستطيع بسهوله التأقلم مع المجتمع لانه اخلاقه وطباعه من النوع المرن القابلل للتمدد والانكماش حسب الظروف واصبح المثل الاعلى لشباب هذه الايام ليس الرجل المثقف او المحترم ولكن اصبح هو الرجل الذى يستطيع ان يكسب فلوس من الهوا او ياكلها وهى والعه ويكون واد حبوب و روش ومش مهم بيشتغل ايه ممكن مغنى شعبى زى شعبان وريكوا وسعد ولا حتى تامر حسنى المهم انه يكون واد ظريف ودمه خفيف وبيعرف يروش اما من يعتقد ان الاحترام والثقافه من الاشياء الضروريه فقد اصبح موضه قديمه ولا لزوم له فى المجتمع ولذلك انصحكم الا تفعلوا مثلى وخليكوا روشين ومقطعين السمكه وديلها وصاحبوا الواد على علوكه واشرف كوخه
اما بالنسبه لى سأبدأ فى اخذ دورات مكثفه فى الانحراف لعلى الحق مكان بينكم

وخليك elastic ومتبقاش blastic

محدش معاه نمره اللمبى

بقلمى

ramy wasel