تيجى نسرق القمر

فكرت اصحى بدرى
علشان الحق طابور السرقه من الاول
اهو منها تغيير مهنه
ومنها اكسب قرشين حلوين زى اخواتنا الوحشين
طبعا مش قصدى السرقه التافه
ام 6 شهور سجن او حتى 6 سنين
ده لعب عيال
ومن رأيي اللى بيسرق بالشكل ده
مش يقطعوا دراعه بس
لا
ده يسنحق الشنق
على غبائه
المهم
قلت ادور على حاجه اسرقها تعملى كام مليون على السريع كده
مسح زور يعنى

وصحيت بدرى
وادور على حاجه اسرقها
مش لاقى
البلد خلصت سرقه يا جدعاااااااان
التوكيلات مسروقه كلها
الاستيراد مسروق كله
الاراضى مسروقه كلها
طيب اسرق ايه
البلد خلصت خلاص
يعنى مفيش اى فرصه للشرفاء امثالى علشان يكونوا نفسهم
ولا بنك حتى اخد منه قرض واخلع
الكلام ده بقى موضه قديمه
فضربت فى دماغى فكره جامده
اسرق القمر
ما الارض كلها خلصت سرقه
يبقى نتطلع الى الفضاء الخارجى
لنبلور مرحله جديده فى عالم السرقه
(ما احنا برضه اهوا)
بس للاسف فشلت برضه فى السرقه
لان لاقيت غيرى صحى من النوم قبلى وسرقوا القمر
وخلاص حيعملوا خط ميكروباظ (عتبه -نيويورك- قمر)
الرحله ب20 مليون دولار
وناس كتير حجزت للرحله
ومش عارف حتى اطلع معاهم
طيب اسرق ايه يا جماعه
يعنى حتى الانحراف مش فالحين فيه
يعنى اعمل ايه بس
انتحر رميا على البلاط

...........
اعتذار
بعتذر لكل الاصدقاء
لعدم قدرتى على متابعتهم
ولكن لظروف العمل
وكل سنه وانتم طيبين
رمضان كريم